علميني يا دنيا إزاي ماأبكيش
و مع كل الألم دة أقدر أعيش
إزاي أداوي جرحي و أردم عليه
و إزاي أنسى حبي و ما أندم عليه
يا دنيا بتقوليلي ما تستسلميش
و مهما كان الجرح ما تنزفيش
ووسط دروب الظلم ماتوهيش
و مهما قسى عليك ماتنكويش
و على كل اللي ضحيتي بيه ماتندميش
ليه يا دنيا .... دة لو قلبي حجر كان طق
من كتر ما بكيت قلبي خلاص انشق
يادنيا بلاش خداع و قولي الحق
الظلم أشد عذاب.. كدة ولا لأ ؟
عارفة يا دنيا هوة عمل فية إيه
ظلمني و قسى علية من غير مايقولي ليه
بعد ما ذقت حبه و عشت أحلى ما فيه
وذقت وده و قربه و حنان ماتلاقيه
غير في حضن قلبه و فجأة ...بتسبيه!
لأة .. هوة اللي سابني و نسى إنه وعدني
و قلت هية أزمة ...و أكيد هاتعدي
و مع طول العشرة دي هايشتري ودي
كان يقدر يواسيني و يمسح الدمع عن خدي
ما تعلميني يا دنيا إزاي ما أبكيش
و مع كل الألم دة أعرف أعيش
شفتي يا دنيا أنا جرحي كبير إزاي
و بتقوليلي إنسي ... طيب قوليلي إزااااي ؟
شكلك يا دنيا موش هاتعلميني
دة انت كمان بتضربيني
عارفة يا دنيا إزاي تريحيني..؟
بسكينة ..و في قلبي اغرزيني
اقتليني...موتيني ... و في ترابك ادفنيني
لأنك يا دنيا موش بتعلميني ...إزاي ما ابكيش
و صدقيني ... مع كل الألم دة موش هاعرف أعيش
يبقى أحسن أموت لأنه ماقدرنيش
*&*
طب ما تخليها كده احسن
ردحذفاتعلمى يا دنيا ازاى ما تبكيشى
وبرغم الالم ده تقدرى تعيشى
وعمرى ما انسى حبى حتى لو ما يستاهلنيش
روعة بجد
نورتى المدونة